【解開防腐劑疑團】

大家都有好多疑問,再喺度講解清楚啲咩係“防腐劑”。
“防腐劑 preservatives ”係一種分類統稱,指防止產品變壞嘅成份,唔係衰嘢,反而係任何產品都必需要有嘅成份,唔一定係化學品,有天然有唔天然,可以用喺護膚品嘅防腐成份最少有幾百種,大家成日都聽人講話有防腐劑嘅嘢一定唔好係大錯特錯。其實現今有爭議嘅防腐劑只係得少數幾種化學成份,paraben係其中一個有問題嘅family,懷疑會致癌同引起皮膚敏感,出面啲產品標榜不含防腐劑大部分只係指不含paraben。

一件產品變壞最主要分兩種原因,第一係有菌,包括細菌同霉菌(即係我哋講嘅“發毛”),有細菌未必可以用肉眼睇得出,但如果去到腐爛嘅程度就會變味發臭。細菌必須要喺有水同有空氣嘅環境先可以生長,要防止有菌就要消毒同埋喺產品中加入抗菌劑,抗菌劑都有N咁多種,唔一定天然亦唔一定化學,每一隻特性都唔同,買嘅時候自己睇清楚產品說明同用法。抗菌劑唔係落得越多就可以keep得越耐,max係咁多時間就係咁多,而且不同配方變壞速度都會唔同,所以冇絕對保存期,最好都係每次整少量盡快用晒,我個人一般都只會keep兩個月。正常情況下所有嘢都唔駛放入雪櫃,除非你屋企冇陰涼地方可以放,理論上雪住係可以存放得耐啲,不過有一樣嘢必需留意,雪咗就一路都雪,唔好成日攞出攞入做成溫差,細菌由凍嘅地方去到暖嘅地方就會即刻高速生長,可能仲衰過你由頭到尾都唔雪,而且小心出現“倒汗水”,好容易發霉。全油配方,例如護膚油、卸妝油、潤唇膏,由於冇水份,基本上唔會有細菌可以生長,所以唔駛加抗菌劑。

第二種變壞原因係氧化,抗氧化劑亦算係防腐劑其中一類。產品接觸到空氣就會慢慢氧化,有油嘅嘢就會出現“油益味”,某啲成份亦會因氧化而失去活性,要防止氧化最簡單就係任何含油產品都加維他命E 0.5-1%。另外乳液、精華等如果想保存得好啲可揀真空瓶儲存,減少接觸空氣就冇咁易有菌或者氧化。記住,抗氧化劑唔可以抗菌,所以唔可能用維他命E或者葡萄籽萃取代替抗菌劑,有油有水嘅產品就要同時加維他命E同埋抗菌。順便一提,點解我話唔好用食油整護膚品,其中一個原因係食油中常用嘅抗氧化劑係BHA或者BHT,無論你買幾靚幾virgin嘅油都一樣會加 (標籤上唔需要列出),而哩兩樣嘢容易引起皮膚敏感。

Share Button

荃灣自取點現已正式營運!訂購材料請WhatsApp聯絡我們

× 立即訂購